O Goberno galego presentou hoxe unha iniciativa dirixida a garantir a actividade do comercio local malia as medidas restritivas postas en marcha polo Goberno central en relación ao COVID-19. Trátase dunha proposta para formalizar un convenio estatal con Correos que permita a continuidade da actividade do comercio local a través da venda en liña.
O proxecto foi dado a coñecer pola directora xeral de Comercio e Consumo, Sol Vázquez, quen participou este mércores 18 de marzo, mediante o sistema de videoconferencia, na Conferencia sectorial de Comercio Interior, presidida pola ministra de Industria, Comercio e Turismo, Reyes Maroto, e que se centrou na actual situación do sector en relación co coronavirus.
A proposta da Xunta incluiría condicións especiais ou bonificacións que axuden aos establecementos de proximidade a superar o estado de alarma e restricións no eido presencial, permitíndolles plenas garantías para vender en liña ou por vía telefónica. Neste sentido, Galicia defendeu a necesidade de combinar axudas económicas con medidas específicas coma o convenio proposto.
No encontro, o Goberno galego mén apoiou a publicación de protocolos para a seguridade e saúde laboral para venda en liña, venda a domicilio e venda ambulante, a maiores da guía de seguridade para o comercio que vai poñer a disposición do sector o Ministerio de Industria.
