A versión de Rise Like a Phoenix do ribeirense Ramón López Martínez convértese en himno anti-pandemia

Se hai algo positivo de todo o sufrimento polo que está a pasar a sociedade coa chegada da pandemia de COVID-19, é o espírito de irmandade e o talento doméstico que traballan desinteresadamente dende múltiples puntos para sacar a relucir, nos fogares, unha das mellores armas que existen contra todo mal: o sorriso. Este é o espírito do vídeo subido polo ribeirense Ramón López Martínez dende a súa canle de Youtube, e no que recrea entre as paredes da súa casa, cun total despregue de medios domésticos, o tema Rise Like a Phoenix de Conchita Wurst, a gran triunfadora do Festival de Eurovisión de 2014.

No vídeo, un éxito en Youtube a poucas horas de ter sido subido (xa chegou ás 325 reproducións malia non ter nin un día de vida), o autor saca todo o arsenal do que dispón no seu confinamento en Santiago, onde cursa estudos, para ofrecer un himno de superación que non ten límites físicos (hai proclamas dende todos recantos da súa casa) nin tampouco dixitais. A canción chámase Quédate en casa e é, en palabras do autor, “a súa primeira participación no Coronavisión”. A peza vai camiño de converterse no himno deste período crítico do que, como dicía a versión de Wurst e reflicte tamén a contribución de Ramón, sairemos voando con forzas renovadas e, sobre todo, máis talentosos e xenerosos ca nunca.