O galeguismo xúntase esta fin de semana de febreiro en Rianxo para render homenaxe a Castelao

Os actos comenzan hoxe con cambio de ubicación dalgún deles por mor da choiva:

SÁBADO 1 DE FEBREIRO

  • 12.00 h. Paseo da Ribeira (diante do busto de Castelao). Ofrenda floral, intervención de autoridades e roteiro Castelao nos Actos Castelao 2020.
  • Por mor da choiva, o acto previsto para hoxe dentro da programación dos Actos Castelao 2020 trasládase para o Salón de Plenos do Concello de Rianxo.
  • A ofrenda floral realizarase no Paseo da Ribeira (diante do busto de Castelao) e as intervencións de autoridades e acompañamento musical no Salón de Plenos do Concello.
  • 20.00 h. Salón de actos do Auditorio de Rianxo: presentación do libro Relatos e lembranzas, homenaxe póstumo a Plácido Betanzos nos Actos Castelao 2020.

DOMINGO 2 DE FEBREIRO

Este 2020 será o ano de Castelao e as múltiples actividades de conmemoración que xa comezaron antes do remate de 2019 (e que se van ir desenvolvendo ao longo destes 12 meses) dan testemuña da importancia do autor rianxeiro neste novo ano. O alicerce das accións previstas é, ademais, un alicerce especialmente amplo: celébrase non só o 70 cabodano do falecemento, senón tamén o 134 aniversario do nacemento do autor de Sempre en Galiza. Un dos puntos álxidos desta axenda de homenaxes e tributos vai ter lugar en Rianxo este 2 de febreiro. Festexaranse o 134 aniversario de Castelao no salón de actos do Concello.

Farán fronte común arredor da actividade as forzas políticas e entidades galeguistas e nacionalistas da nosa terra, convocadas polo Partido Galeguista (PG). Trátase, nas súas palabras, “dun acto de reafirmación da universal identidade galega”, unha identidade e un sentimento común que é “semente de porvir” e, como tal, ramificarase alén deste 2 de febreiro para estender a celebración do aniversario a “todos os días do ano”.

O programa do acto empeza coa recepción, as 11:30 horas, no salón de actos do Concello de Rianxo, do Alcalde de Rianxo, Adolfo Muiños, máis as/os representantes dos partidos, fundacións, colectivos e asociacións do territorio Galego e da diáspora que apoian este acto.

Intervirán as seguintes personalidades e colectivos: Partido Galeguista (Francisco López Chesqui, Xesús Manuel Suárez), BNG (Goretti Sanmartín e Xosé Luís Rivas Mini), En Marea (Luís Villares), Cerna (Paula Verao), Anova (Antón Sánchez), CxG (Rafa Cuíña), PCPG (Xosé Collazo), Fundación Castelao (Davide Otero), Fundación Alexandre Bóveda (Valentín Bóveda), Fundación Rosalía de Castro (Anxo Angueira), Ateneo Galeguista de Ourense (Parlamentario Galego Davide Rodríguez), Fundación Penzol (Inma Valeixe), Fundación Otero Pedrayo (Juan Saco), Fundación Martínez Risco (Luis Martínez Risco), Fundación Filgueira Valverde (Fernando Filgueira), Fundación Losada Diéguez, Federación Sociedades Galegas na Arxentina (Luís Tosar), Centro de Galicia en Bos Aires (Teresa Táboas), PNV (comunicado do presidente Andoni Ortúzar) e Nós Galeguistas (Xabier González).

Ao remate das intervencións, diante do busto de Castelao, o actor e guía Suso Martinez interpretará ao senlleiro político e escritor rianxeiro e declamará un fragmento dun dos seus escritos, redactados en New York e máis no buque Argentina en 1940, recollidos os dous no célebre ensaio Sempre en Galiza.