O espírito do Entroido invade Arousa Norte

24 Febreiro 2020

Despois dunha intensa fin de semana continúa a festa na comarca da man da programación que se desenvolve con motivo do Entroido. Os disfraces e a música conquistan a rúa; mentres que as filloas, orellas e melindros fan o propio nos fogares.

Ribeira vibrará esta noite co concerto previsto, ás 00.00 horas, na carpa do Malecón a cargo do grupo Los Alcántara, achegando temas dos 60, 70 e 80. A continuación, a sesión Discomóbil tomará o relevo para amenizar a madrugada. Tamén cómpre salientar o concurso de disfraces de Entroido que se levará a cabo desde as 22.00 ata as 04.00 horas polos distintos locais participantes da hostalería. Haberá gratificacións económicas nas modalidades de individual, parella e grupo. O prazo de envío das fotografías para a deliberación do xurado é desde este mesmo día ata as 23.59 horas do 2 de marzo. Neste senso, repartiranse premios por valor de 2.500 euros.

Pola súa parte, Rianxo acollerá no seu Pavillón Polideportivo a actividade De-porte Choqueiro, organizada pola Concellería de Deportes, entre as 16.30 e as 19.30 horas.

A xornada de mañá focalizarase en numerosos desfiles e concursos. En Ribeira, coincidindo co festivo local, realizarase o Festival de Murgas e Comparsas, con saída do Auditorio municipal, ás 17.00 horas, acompañadas por numerosas charangas e personaxes desfilando por rúas Portugal, Romero Ortiz, Galicia, praza da Concordia, García Bayón, Malecón ata a carpa do Entroido na praza do Porto. O festival estará presentado polo dúo cómico formado por Pedro Brandariz e Fran Rei. En total, destínanse 6.000 euros -3.650 euros para as gratificacións e 2.350 euros para os premios-. A decisión recaerá nun xurado composto por seis membros: tres profesionais; a concelleira de Cultura, quen ostentará a presidencia do mesmo; un membro elixido ao azar entre o público; e un secretario.

Na Pobra do Caramiñal terá lugar un desfile que sairá ás 17.30 horas desde A Covecha ata rematar na rúa Castelao, onde se levará a cabo o concurso presentado polas humoristas Anabel Gago e Chelo do Rejo (A Quixota e Sancha Panza). Haberá numerosas distincións e, mentres o xurado delibere, Batukabras encargarase de que non decaia a diversión.

Tamén en Boiro se celebrará o xa tradicional desfile e concurso de disfraces e carrozas, no que se van repartir 3.000 euros en premios. A saída será ás 17.00 horas desde a praza do Concello.

E, en Rianxo, tocará participar noutro programa de obradoiros e xogos, a partir das 17.00 horas, na praza Castelao, concretamente na carpa do Entroido.

Outros artigos

Publicidade

Revista en papel

Opinión

“Auditorio” – José Manuel Pena

“Auditorio” – José Manuel Pena

Xa é unha grata realidade, o novo auditorio. Ribeira, necesitaba un auditorio en condicións e adecuado ao seu número de habitantes e da importante poboación da propia comarca do Barbanza. Este pasado sábado chegouse a inaugurar oficialmente, coa presenza de diferentes...