Rianxo foi e será sempre un puntal en Entroido, un deses espazos xeográficos que non coinciden co delimitado dentro do mítico triángulo ourensán pero onde a chama da festa mantense acesa malia o paso do tempo. Un dos elementos clave da festa rianxeira en febreiro é o Certame de Carrozas, que se celebra este ano o 23 de febreiro ao abeiro da programación municipal do Entroido 2020. O Concello vén de publicar información cumprida sobre o certame, incluídas as bases e os requirimentos para inscribirnos e participar.
Unha vez máis, será un certame “popular e partiticipativo”, programado para que prevaleza o ambiente festivo, o humor, a creatividade e, por enriba de todo, o espírito de liberdade que exemplifica a figura do choqueiro en Rianxo e nos concellos da contorna. Valoraranse cousas como facer crítica construtiva e retranqueira (dos distintos poderes, do famoseo, de acontecementos polémicos e destacábeis recentes) e exaltar a cultura festeira e da gastronomía tradicional.
O comezo do certame está previsto para as 17:00 horas do 23 de febreiro. Segundo se fai saber nas bases, as carrozas deberán presentarse entre as 16:30 e 17:00 horas na zona do Porto. Poderá participar neste certame “calquera entidade non lucrativa legalmente constituída”, ou ben “os grupos informais de persoas, interesados en conformar unha carroza de entroido”. A data límite para efectos de inscrición será o 20 de febreiro ás 14 horas.
Nas bases tamén se fai saber que “en caso de condicións climatolóxicas adversas”, o certame poderase aprazar para outras datas vindeiras, decisión que se tomará como máximo ata o domingo 23 de febreiro ás 13.00 h.
