O audiovisual da nosa comarca vén de obter un importante recoñecemento. Estamos a falar do Premio José Sellier que concede a Academia Galega do Audiovisual ás entidades e iniciativas que máis e mellor traballan na Comunidade por facer voar o talento cinematográfico da canteira (e, tamén, da xente xa consagrada), e que este ano irá dar ao festival escolar Olloboi, posto en marcha en Boiro e na actualidade mergullado na súa décima edición.
O premio, en palabras da academia, vén dado pola aposta do festival boirense a prol do cinema “como unha ferramenta transversal para a educación en valores, a promoción da cultura e o idioma galegos entre a xuventude e a visualización dun compromiso ambiental e social coa entorna”. Tamén salienta o traballo feito para favorecer que a nosa mocidade atope a súa voz nas linguaxes cinematográficas. A entrega dos premios desenvolverase este venres 21 de febreiro no Encontro de Finalistas dos XVIII Premios Mestre Mateo que se celebrará na Coruña.
As orixes do certame
A Asociación Cultural Olloboi naceu do labor dun grupo de docentes asentados no Barbanza desde o ano 2009, ao que se lle foi engadindo xente de fóra do ámbito educativo. Constituídos como asociación, organizan cada ano o certame escolar Olloboi, coa finalidade de “promover que o cine galego chegue ás aulas” dunha maneira creativa e participativa, e, a ser posíbel, en galego. O seu equipo de dirección está constituído por Lolo Garrido e Susana Diz, que asumen a parte de deseño, Petro Álvarez, que coordina a admisión de vídeos e supervisa os contidos e Ana Moreiras, que coordina, comunica e produce. Ademáis, Yaiza Vicente e Javi Paz encárganse de xestionar a parte informática e de redes e Sara Hermo colabora en traballos de produción e realización.
O nome de Olloboi xorde da unión de dous conceptos: o ollo, unha alusión directa á visión, ás lentes e por outra Boi, en referencia a Boiro, o municipio do Barbanza que acolle cada ano o festival.
Como dixemos, este 2020 o festival celebrará a súa décima edición, unha convocatoria na que vai participar un importante número de escolares, docentes e profesionais do sector, tanto nas proxeccións en si mesma, como nas seccións de cinema de guerrilla. Contará coa colaboración de cineastas e a cidadanía de Boiro (Muchachada 4×4) e unha entrega de premios nos Asteleiros Triñanes.