Rianxo foi este venres 21 de febreiro o escenario dun importante dispositivo de tráfico e seguridade cidadá con motivo da celebración do Entroido 2020 nos centros docentes do termo municipal. No operativo participaron os axentes da Policía Local e máis os integrantes do grupo de Protección Civil de Rianxo. O dispositivo centrouse na praza de Castelao da capital do concello pero tamén nas ruadas e desfiles protagonizados polos escolares dos centros docentes de Rianxo, Taragoña, Asados e Araño.
Segundo informou a Policía Local, nas actividades deste venres participaron arredor dun milleiro de rapazas e rapaces e membros da comunidade educativa do concello rianxeiro.
O dito dispositivo proseguirá os días vindeiros, con motivo das restantes actividades programadas para a celebración do Entroido. Haberá sinalización circunstancial de prohibido estacionar nas zonas onde se van a realizar as actividades, e tamén realizaranse cortes de tráfico puntuais sinalizados, engadiu a Policía Local.