Este xoves 13 de febreiro tócalles falar ás familias e expoñer as súas dúbidas e preguntas acerca das metodoloxías máis indicadas para pór freo ás drogodependencias entre as novas xeracións. O motivo? A celebración dunha nova convocatoria, a segunda, do Faladoiro Espazo das Familias de Boiro, unha cita de diálogo e participación que contará coa presenza de María José Iglesias Fungueiriño, psicóloga e especialista en terapia familiar, promoción de hábitos saudábeis e prevención de condutas aditivas, que impartirá o coloquio Falemos de adolescencia e cannabis.
A cita será a partir das 18.00 horas (até as 20.00 horas) na Casa da cultural Ramón Martínez López. As persoas que estean interesadas en acudir poden formalizar a inscrición nos centros educativos locais ou ben a través do espazo web espazofamilias.org/reserva.
