Rianxo en Común vén de expresarse sobre a perda de poboación no municipio, pasando dos 11.769 no 2009 aos 11.033 no 2019, segundo os datos do Instituto Nacional de Estatística (INE). A formación lamenta este “grave problema de despoboamento” e sinalan que desde que o BNG accedeu ao goberno local “a cifra de habitantes non fixo máis que descender.” Neste senso, manifestan que “os datos son demoledores, e semella que a día de hoxe o goberno segue sen tomalos en serio, máxime cando dende o propio goberno se gababan nun dos últimos plenos ordinarios da corporación polo feito de que descenda o paro no municipio.”
Ademais, indican que levan anos alertando desta situación, “ao que se nos respondeu habitualmente que o problema do despoboamento é un problema común a boa parte do país”, mais consideran que o caso rianxeiro é “especialmente preocupante” comparándoo cos datos dos demais concellos de Arousa Norte.
Así, Rianxo en Común afirma que lle tende a man ao goberno e propón a creación “de inmediato” dunha mesa de traballo entre tódalas organizacións políticas con representación no Concello que se reúna de xeito periódico, procurando solucións para o que cualifican como “a sangría demográfica que vive Rianxo.”