Os operarios da EDAR de Couso manteñen reunións co alcalde de Ribeira e o resto de grupos da corporación

20 Xaneiro 2020

Os traballadores da EDAR de Couso achegáronse hoxe ata a Casa do Concello de Ribeira para transmitir a súa preocupación ante a posibilidade de que a xestión da depuradora e dos colectores conducentes á mesma sexa dividida entre varias Administracións.

Así, asistiron seis dos oito operarios que traballan nas instalacións, pois os restantes non puideron acudir ao ser preciso que a EDAR conte coa presenza de persoal en todo momento. Primeiramente mantiveron unha reunión co alcalde Manuel Ruiz, onde manifestaron sentirse preocupados porque non ven lóxico que se separe unha parte da infraestrutura da outra. A este respecto, argumentaron que a xestión de toda a infraestrutura está centralizada nun único punto co que, para eles, carece de sentido que, dun lado, Augas de Galicia se encargue da explotación e mantemento da estación situada en Couso e, do outro, o Concello sexa o responsable dos bombeos, colectores e tanques de tormenta que conectan coa mesma.

Logo da xuntanza co rexedor, os operarios mantiveron un segundo encontro con outros dous grupos municipais, concretamente BNG e PSdeG-PSOE, para trasladar esta inquedanza; así como o relativo aos seus postos de traballo. Tamén tiñan intención de transmitirlla aos outros dous partidos da corporación, PBBI e Suma Ribeira. De feito, con este último manterán unha reunión esta mesma tarde.

Por outra banda, os traballadoras da EDAR aseguraron que fai moito tempo que non reciben ningunha queixa por cheiros ou outros problemas derivados do funcionamento da depuradora.

Outros artigos

Publicidade

Revista en papel

Opinión