A plataforma Patrimoniogalego.net, o catálogo social da nosa riqueza inmóbel (un espazo colaborativo e documental para pór en valor os moitos tesouros patrimoniais dos nosos concellos: pazos, casas, cruceiros, fontes, castelos, ingresas, capelas, etc), comezou 2020 reafirmando o seu carácter referencial como a gran base de datos do noso autocoñecemento histórico. O portal, posto en marcha aló polo 2011 co mellor dos impulsos posíbeis (foi quen de superar, aos tres meses de andaina, os 200 bens inventariados), está neste intre poñendo todo da súa parte para acadar a destacada cifra dos 15.000 bens catalogados.
Entre as máis recentes incorporacións figuran as relevantes edificacións históricas de Escornabois (Trasmiras), o Pazo de Santa María de Vigo (en Cambre), o Castro da Touza en A Mezquita ou o Cruceiro de Ponte Goiáns (Boiro). Respecto das novidades tecnoloxías que cada pouco se incorporan á plataforma, á inclusión de fichas de fotogrametrías 3D materializada hai uns tres anos, cómpre engadir outra máis recente: a estrea dos mapas enfrontados, que é unha funcionalidade que permite coñecer a evolución do estado de conservación dos nosos bens a través da comparación simultánea entre as fotografías aéreas de 1956 e a actualidade.
A pegada do Barbanza
A contribución dos concellos da nosa comarca é moi relevante, non só pola gran cantidade de tesouros que inventariar e cuxa conservación e posta en valor cómpre reivindicar, senón tamén polo importante labor de rexistro e investigación despregado polos membros locais da comunidade de Patrimoniogalego.net, como por exemplo o palmeirense Manolo Gago, que foi, ademais, un dos grandes impulsores da iniciativa.
Por concellos, un dos que máis destaca en materia de cantidade e calidade de elementos visualizados é Boiro, que ten preto dun centenar de entradas, entre cruceiros, mámoas, pazos (por exemplo o de Goiáns), castros, casas grandes, igrexas (por exemplo a de Santa Baia) e capelas.
Polo que respecta a Ribeira, participa no catálogo con case medio cento de tesouros do seu concello, entre os que destacan o porto de Palmeira, o Faro de Corrubedo, a Igrexa de Palmeira ou o Pazo de Otero Goyanes en Ribeira.
Tamén salienta a presenza de Rianxo, que contribúe con case 70 elementos documentados ao detalle, entre os que se contan (por exemplo) o Pazo de Baltar a carón da praia de Tanxil, a aldea esquecida de Abuín ou o Cuartel Vello de Rianxo, entre outros moitos.
A Pobra do Caramiñal tamén vén sendo un dos concellos galegos máis sobranceiros no portal Patrimoniogalego.net, con 59 construcións e elementos documentados polo miúdo, entre os que se atopan monumentos tan relevantes como a Torre de Bermúdez, a Casa do Concello ou a Casa Grande de Aguiar.
O inicio do proxecto
Como
dixemos, o portal Patrimoniogalego.net foi posto en marcha hai case
unha década como un Sistema de Información Xeográfica (SIX) aberto
a toda a cidadanía, independente e sen ningún ánimo de lucro, dado
que ten como único fin “a preservación do patrimonio cultural
galego”. Nel teñen participado unha serie de voluntarios,
profesionais en distintas disciplinas, que decidiron sacar adiante
este proxecto de xeito desinteresado a partir da creación da
plataforma cidadá Eu participaría dunha Mesa polo Patrimonio de
Galicia, xurdida na rede social Facebook a iniciativa
do divulgador e profesor da USC Manuel Gago.
O equipo orixinario
estaba integrado por Milagros Bará, Álex Bragaña, Soledad Felloza,
Manuel Gago, Adela Oyonarte, Franjo Padín, Carmela Sánchez Arines,
Elixio Vieites, Xosé Gago, Xurxo Salgado e Félix Aragunde.
