O ribeirense Festival do Nadal Concilia contou coa participación de setenta e cinco cativos

Como vén sendo tradicional, o Conservatorio Municipal de Ribeira ‘Enrique Paisal’ foi esta mañá escenario do Festival do Nadal Concilia, onde un total de 75 nenos e nenas de entre 3 e 8 anos, distribuídos en tres grupos en función da idade, cantaron e bailaron ao son das panxoliñas para deleite das nais, pais e demais familia que se achegaron ata as instalacións.

A concelleira de Cultura, María Sampedro, procedeu a entregar a cada cativo o seu diploma, uns caramelos e un vale para o sorteo do día da cabalgata. Estes campamentos empezaron o 23 de decembro, prolongándose a súa duración ata o 7 de xaneiro co obxectivo de facilitar a conciliación da vida familiar e laboral dos seus proxenitores nestas datas de festa non lectivas.