Un home de 60 anos e veciño de Rianxo, L. A. O., faleceu na noite deste xoves ao ser atropelado na zona portuaria da localidade. Segundo informaron fontes policiais, o aviso chegou ao redor das 21.30 horas do Centro Integrado de Atención ás Emerxencias (CIAE) 112 Galicia comunicando o suceso.
Ata o lugar desprazáronse a Policía Local de Rianxo, equipo de atestados da Garda Civil de Tráfico, bombeiros e ambulancia. O persoal médico procedeu coa reanimación, mais nada se puido facer porque o home faleceu no acto. O levantamento do cadáver efectuouse en torno ás 01.00 horas.
No que respecta ás circunstancias, as fontes policiais apuntaron que, segundo as primeiras conclusións, o atropelo produciuse cando o viandante intentou cruzar a calzada por unha zona non habilitada, entre vehículos, con condicións luminosas escasas e non portaba ningunha prenda reflectante. Por outra banda, someteuse ao condutor do vehículo implicado ao control de alcoholemia, dando negativo.
