A igrexa de San Domingos de Bonaval en Santiago acolleu este martes 7 de xaneiro a celebración oficial do 70 aniversario da morte do escritor, político e artista rianxeiro Alfonso Daniel Rodríguez Castelao, cuxos restos mortais repousan no dito tempo compostelán. O acto, no seu miolo unha ofrenda floral, foi organizado pola Fundación Castelao e contou coa presenza do seu presidente, Carlos Mella, do seu vicepresidente e secretario, Miguel Anxo Seixas Seoane, e máis do secretario xeral de Política Lingüística, Valentín García, entre outros persoeiros da nosa cultura.
O encargado de conducir a homenaxe foi Seixas Seoane, que aproveitou para lembrar o importante legado de Castelao, un legado de gran valor artístico e cultural pero, tamén, un legado de pensamento libre, democracia, galeguismo, integridade, identidade e defensa firme de todos aqueles que foron, son e serán vítimas das inxustizas e dos abusos do poder.
Pola súa banda, Valentín García enxalzou a figura do autor de Sempre en Galiza, coñecida e recoñecida como “peza clave da nosa historia”, un “dos nosos autores máis universais e unha das persoas que máis traballou na defensa da cultura e a identidade galegas”, dixo.
O acto, no que participou un nutrido grupo de intelectuais e políticos da nosa terra, serviu tamén para conmemorar o centenario da revista Nós (cuxo director artístico foi o escritor rianxeiro).
