A rula galega que máis volume de negocio xerou pola poxa deste cefalópodo no que vai de campaña foi a de Ribeira. Entre xullo e decembro o centro de primeira venda ribeirense facturou dous millóns de euros, unha caída de apenas o 4% en comparación con 2018, cando ingresaran 2,13 millóns de euros. O porto da capital do Barbanza descargou nestes seis meses 268 toneladas da especie polas 223 toneladas do anterior exercicio, un aumento do 20% que rompe coa tendencia xeral en Galicia. Como consecuencia, o prezo medio do polbo caeu dous euros xa que en 2018 o quilo estaba a 9,6 euros e na actualidade rolda os 7,6.
A campaña do polbo deixa unha caída do 30% na facturación nas lonxas galegas A frota galega de artes menores captura polbo desde o pasado 1 de xullo. A peche do mes de decembro as lonxas de Galicia rexistran peores números que hai un ano. Caen tanto as descargas deste cefalópodo como a facturación xerada pola súa comercialización, aínda que este apartado é o máis afectado. Os centros de primeira venda da comunidade ingresaron entre xullo e decembro 8,8 millóns de euros, mentres que no mesmo período de 2018 a cifra superaba os 12 millóns de euros, unha caída do 28%, segundo os datos provisionais consultados na Plataforma Tecnolóxica da Pesca, dependente da Consellería do Mar.
