Desde o 20 e ata o 26 de xaneiro, a Policía Local de Rianxo participa nunha campaña especial de vixilancia das condicións dos vehículos, impulsada pola Dirección Xeral de Tráfico (DXT). Neste senso, realízanse controis comprobando se os vehículos levan ITV e seguro obrigatorio en vigor, ademais de revisar elementos de seguridade tales coma pneumáticos, luces, parabrisas e sinalización.
Para proceder coas comprobacións de documentación dos vehículos e permisos de conducir dos condutores, os axentes dispoñen dunha tablet con conexión a Internet, coa cal poden constatar os datos, de xeito rápido, directamente da base da DXT.
Así mesmo, efectuaranse probas de alcoholemia e drogas se detectan que algún condutor pode ir baixo a influencia destas substancias.
Na quenda da mañá do día de onte, tramitáronse dúas denuncias administrativas ao interceptarse dúas furgonetas que tiñan caducada a ITV.
