Despois de que o pasado venres se procedese na Pobra ao acendido do alumeado, á inauguración do Belén municipal e á apertura do Mercado do Nadal, o Concello amplía a oferta de actividades a desenvolver nestas datas. Ao acto de presentación asistiron o alcalde Xosé Lois Piñeiro; a concelleira de Igualdade e Dinamización Económica, Charo Varela; e o seu homólogo de Mocidade, José Andrés Lojo.
A edil Charo Varela explicou as actividades que se desenvolverán no Mercado do Nadal, emprazado no Cantón da Leña, e que consta de seis postos do comercio local dedicados á artesanía, gastronomía, obxectos de regalo e arranxos florais, entre outros. Este espazo abrirá os venres, sábados e domingos ata o 5 de xaneiro e celebraranse obradoiros infantís os sábados e domingos, de 19.00 a 21.00 horas; showcooking ás 13.00 horas do 15 e 22 de decembro, así como do 4 de xaneiro; chocolatada organizada polo Club Remo Puebla para as 19.00 horas do 14 e 15 de decembro; obradoiro musical a cargo da Banda de Música Ateneo Musical da Pobra o 15 de decembro; visita dos Papá Noel do Motoclub Sin Frenos o 22 de decembro; e concurso de cociña do Nadal coas asociacións Arrancadeira, Eiradela e Xiada para o 28 e 29 de decembro.
A programación tamén inclúe a representación de pezas teatrais no Elma. No bloque destinado a persoas maiores de 16 anos, Quico Cadaval, Celso Sanmartín e José Luis Gutiérrez (Guti) subiranse ás táboas o 15 de decembro, ás 19.00 horas, con Tres vellas (polo menos). Mentres tanto, as obras dirixidas a un público infantil e familiar inclúe a representación de Rubicundo, da man deTeatro Ghazafelhos, o 26 de decembro, ás 18.00 horas; Saaabor!, de Culturactiva, o 27 de decembro, ás 18.00 horas; e a Xanela do Maxín con A toupiña que quería saber quen lle fixera aquilo na cabeza, o 30 de decembro, ás 18.00 horas.
Así mesmo, as asociacións organizan os seus festivais tamén no Elma. O 14 de decembro, ás 19.00 horas, chega o Nadal con Caramiñas, un festival de canto, baile e música tradicional da Asociación de Amas de Casa, Consumidores e Usuarios Caramiñas; o Festival de Nadal Arrancadeira terá lugar o 21 de decembro, ás 19.00 horas; e o Concerto Solidario de Nadal da Banda de Música Ateneo Musical da Pobra festexarase o 22 de decembro, ás 19.00 horas.
Ademais, haberá o Pequetroula para facilitar a conciliación, do 13 de decembro ao 4 de xaneiro, na praza Maior. Trátase dunha ludoteca para os máis pequenos, integrada por obradoiros de Nadal, globoflexia, pintacaras, tatuaxes de purpurina e contacontos. Tamén se disporán inchables tódolos sábados e nas xornadas do 23 e 30 de decembro, así como o 2 e 3 de xaneiro. Da mesma maneira, o 23 de decembro terá lugar un taller de construción de casas-niño; mentres que o 24 de decembro se celebrará a visita de Papá Noel. O horario é de luns a venres, de 17.30 a 21.30 horas; e sábados, de 12.00 a 14.30 horas. Os días 24 e 31 de decembro, de 17.30 a 19.30 horas. A entrada é de balde presentando un tícket de compra do comercio local.
Por outra banda, o concelleiro José Andrés Lojo expuxo as actuacións musicais que haberá na rúa. Neste senso, o 21 de decembro, a partir das 23.00 horas, chegará DJ Goro e Chocolate Discomóvil; o 28 de decembro, a partir das 20.00 horas, será a quenda de The Final Lap Fest; o 1 de xaneiro, a partir das 02.00 horas, os DJ’s amenizarán o Aninovo; e o 12 de xaneiro celebrarase o serán galego Vive, aprende e desfruta do noso. Todas estas citas desenvolveranse na praza Maior, sumando a praza Valle-Inclán no Aninovo.
Na súa intervención, o rexedor Xosé Lois Piñeiro manifestou que “imos ano a ano ampliando un pouco a oferta de actividades que presentamos”, sendo froito da colaboración das distintas Concellerías, veciñanza, sector do comercio e asociacións. Tamén destacou o concurso de cociña coas asociacións Arrancadeira, Eiradela e Xiada, o cal se desenvolverá no Mercado do Nadal os días 28 e 29 de decembro, dispoñendo dunha cociña portátil que se conseguiu grazas a unha subvención. Un evento que agardan que contribúa a dinamizar o referido espazo e “para facer que a xente saía á rúa, participe e se divirta.”
Finalmente, os Reis Magos visitarán o municipio o 5 de xaneiro, a partir das 17.30 horas, na tradicional cabalgata, contando coa colaboración de Protección Civil e numerosos voluntarios. Cómpre lembrar que a xente pode participar na cabalgata anotándose no propio Concello a partir do luns.
