Óscar Sobrido “Amroth”, técnico administrativo, membro de Teatro do Improvisto e músico, foi escollido presidente da asociación cultural Altofalante.
A asemblea celebrada na tarde do pasado venres 20 de de decembro no Ateneo Valle-Inclán acordou renovar a directiva agradecendo o traballo realizado pola anterior que presidiu Laura Pego.
A nova directiva mistura perfís con experiencia como Marivén Sampedro, que continúa como vicepresidenta, ao tempo que incorpora novas persoas como Luís Pérez e Silvia Varela que ocuparán os cargos de secretario e tesoureira, respectivamente.
O colectivo avoga por manter as actividades tradicionais como o premio Altofalante do ano, o traballo a prol do galego e da memoria histórica, mais tamén prevén realizar novas actividades e aumentar os ámbitos de traballo como poden ser o feminismo, a arte e a música.
A asociación mantén a súa aposta pola renovación xeracional na composición da directiva, pois a maior parte é menor de 30 anos e con perfís plurais.
O novo presidente, Óscar Sobrido, declarou que o obxectivo debe ser “fortalecer a cultura propia de Galiza en todas as súas facetas, nun momento crítico, como é o actual, cómpre activarnos socialmente”.
Laura Pego, Teresa Prol, Vicente Paz, Cruz Rivadulla, Ánxela Suárez, Uxía Fernández, Alexandre Ríos, Sara Maneiro, Agustín Pérez, Diana Lixó e Elvira Blanco completan a directiva.
