O Concello de Rianxo, a través do seu Servizo de Normalización Lingüística, vén de presentar unha serie de material conmemorativo a disposición do comercio local para que os diversos establecementos do termo municipal (e por suposto os seus clientes) poidan desfrutar estas festas que se aproximan dunha maneira netamente “rianxeira” e en galego. Os diferentes elementos deste particular merchandising local, destinados exclusivamente á celebración do Nadal, estanse a achegar a comercios e locais de hostalería adheridos á campaña En Rianxo, ao noso xeito.
O material está conformado por etiquetas para agasallos para o comercio (En Rianxo, ao noso xeito “Agardo que che guste”; En Rianxo, ao noso xeito “Con todo o meu agarimo”; En Rianxo, ao noso xeito “Parabéns”), por manteis infantís para hostalaría con diversas actividades de lecer e xogos (unir os puntos para acadar a figura do Apalpador, sopas de letras, pasatempos) e por cartas dos Reis Magos para o comercio.
O Concello lembra que os comercios, bares e restaurantes adheridos á campaña que desexen recibir o material deben pórse en contacto co Servizo de Normalización Lingüística, chamando ao teléfono 881 988 891 ou escribindo un correo a: normalizacion@concelloderianxo.gal