O grupo nacionalista de Boiro (BNG) que coordina Raquel Suárez Regades vén de presentar unha moción para ser tratada en pleno acerca da situación administrativa da estrada DP -1105 que une os concellos de Boiro e Noia, a día de hoxe pertencente á Deputación Provincial da Coruña. Segundo fai saber a agrupación, o viario presenta importantes deficiencias que redundan en problemas de seguridade, como por exemplo a falta de reflectores nas beiras do firme e a ausencia de garda-carrís nalgúns dos seus treitos. Tamén ten eivas de alumeado, “polo que se sería preciso mellorar a seguridade viaria, sobre todo para as horas nas que cae o sol e cando hai escasa visibilidade por mor da chuvia ou da néboa”.
A agrupación sinala que para emendar estas eivas, poderíanse instalar reflectores ao longo da estrada, marcar os límites da mesma, mellorar o pintado das liñas ou calquera outra actuación que implique poñer a punto a seguridade viaria.
O Bloque, nun plano máis concreto, lembra que hai determinados treitos da estrada ao seu paso por Boiro nos que “habería que facer actuacións específicas”. Así, indican, “a rotonda de Bermo que regula o acceso á autovía, o Polígono de Espiñeira ou Cimadevila, cunha grande densidade de vehículos, tanto lixeiros como pesados, precisa mellorar a súa seguridade mediante un correcto alumeado artificial da propia rotonda e da zona contigua”. Amais, engaden, “no lugar de Xarmea precísase asegurar a protección para os peóns coa correcta sinalización deste tramo e coa construcións de beirarrúas”.
