A escritora Helena Villar Janeiro, afincada na aldea rianxeira de Abuín (Leiro) dende hai anos, será unha das autoras recoñecidas na 21 edición do Salón do Libro Infantil e Xuvenil de Pontevedra. A distinción vén dada pola longa e destacada traxectoria da escritora en materia de literatura para crianzas, un xénero que ten cultivado con obras tan senlleiras como A canción do rei (1992) ou as máis recentes Contos do Sol e da Lúa (2017) e Fina a pirata (2019), entre outras moitas. Así até máis ou menos dúas ducias de contribucións literarias para a rapazada e, tamén, para a xuventude.
O recoñecemento será unha distinción dupla (por vez primeira na historia do salón). De feito, tamén está previsto enxalzar a traxectoria creativa do debuxante Kiko da Silva, autor e ilustrador vigués nado no 1979 e responsábel de publicacións tan sobranceiras como Retranca, B de Banda ou A Viñeta de Schrödinger. Kiko da Silva tamén é o creador do personaxe Orbil, a mascota do Salón do Libro Infantil e Xuvenil.
Volvendo a Helena Villar, conxugou durante a súa longa carreira creativa os oficios literario e docente, unha dupla vertente que segue a manter activa nas redes sociais, onde leva a cabo unha intensa actividade creativa, divulgativa e pedagóxica. Amais de ser autora dunha manchea de obras infantís, é poeta, narradora, ensaísta e articulista. É nai do pianista Abe Rábade e da tamén poeta María do Cebreiro. Segundo fixo saber tras ter coñecemento da homenaxe pontevedresa, a distinción do Salón do Libro Infantil “é un dos mellores obsequios que podía recibir”, cousa que aínda cobra máis relevancia ao ter que compartilo “co admirado e amigo Kiko da Silva”.