A Pobra do Caramiñal é un municipio que dinamiza e pon en valor a cultura. Proba disto é a cantidade de actividades que se desenvolven. Así, o Auditorio do Museo Valle-Inclán acolleu na tarde de onte a entrega do II Premio de Literatura Infantil Carlos Mosteiro, que este ano, recaeu no escritor Xosé A. Neira Cruz por O enigma do baúl pechado. Unha decisión tomada por unanimidade por parte do xurado composto pola escritora e gañadora da anterior edición, Patricia Mallo; a vogal da Asociación Cultural Barbantia, Pilar Sampedro; e o director xeral da Editorial Galaxia, Francisco Castro. O premio consiste na publicación da obra por parte de Galaxia na súa colección Árbore e 1.500 euros para o gañador.
A vertente musical do acto -organizado polo Concello, a Editorial Galaxia e a Asociación Cultural Barbantia- correu a cargo da Escola de Música da Pobra do Caramiñal. Seguidamente, Pilar Sampedro ofreceu unha conferencia sobre a narrativa de Carlos Mosteiro, centrándose principalmente en catro das súas obras: Unha bruxa ben rara, O día que Miguel Induráin pasou por Gonderande, Manual de instrucións para querer a Irene e Ese unicornio rosa. Dúas novelas infantís, unha xuvenil e un libro de relatos que estiveron expostos ao longo de todo o evento, pois “os libros de Carlos é necesario que estean sobre a mesa. Hoxe porque estou falando eu deles, pero creo que sempre que se celebra este premio, deberían aparecer os libros del aquí porque, xustamente, o premio ten lugar porque os seus libros están.” Sampedro manifestou que “cando falamos de Carlos Mosteiro, o primeiro que temos que dicir del é que é un autor de literatura infantil e xuvenil, e que ese é un xénero escolleito por el. El decide escribir para os pequenos”, engadindo que a súa obra adscríbese ao realismo cotiá (a escola, os amigos, as relacións familiares…) cun interior moi imaxinativo e con algúns toques de marabilloso ou de misterioso.
A continuación interveu Francisco Castro, quen expresou o “doado” que resultou botar a andar a referida distinción por parte do Concello, A. C. Barbantia e Editorial Galaxia. Aproveitou a ocasión para destacar o labor que desenvolve a citada asociación cultural e anunciou que a presentación do libro gañador deste ano terá lugar no mes de febreiro ou marzo, contando con ilustracións de Patricia Castelao. Tamén ratificou que non houbo dúbidas respecto a que o texto de Xosé A. Neira Cruz era merecedor do premio.
Na súa intervención, Isabel Santos afirmou que “Carlos estaría orgullosísimo de que o seu nome se mesturase con literatura e xente nova”, procedendo despois á lectura da acta na que se salienta “a fermosura da linguaxe poética” que emprega o autor na obra galardoada, “malia tratarse a temática dunha cuestión dura e difícil como son as dificultades que moitas veces teñen as persoas inmigrantes para se integrar entre nós, tanto dende o punto de vista social como cultural.”
Pola súa parte, a concelleira de Cultura, Patricia Lojo, exerceu de condutora do acto e fíxolle entrega do premio ao gañador, precisando que O enigma do baúl pechado “trátase dunha obra que entronca coa literatura galega, de realismo máxico, abordando un amplo abano de temas que van dende a amizade ata o multiculturalismo, pasando polo poder das palabras e pola relación interxeneracional entre nenos e nenas cos seus avós e as súas avoas.”
O propio autor quixo expresar o seu agradecemento e indicou que foi o editor do libro O día que Miguel Induráin pasou por Gonderande, de Carlos Mosteiro, subliñando que lle quedou o pouso “dun home bo e era algo que se transmitía, simplemente, mirándolle aos ollos”, constituíndo unha honra vencellar o seu nome ao de Mosteiro.
Ademais, Julia Gema Fernández Pla, responsable do obradoiro impartido o ano pasado sobre ilustracións da obra de Mosteiro, fíxolle entrega a Lourdes Briones, muller do escritor que da nome a este certame literario, dun obsequio consistente nunha carpeta coa ilustración.
