Este 25 de novembro, Día Internacional da Eliminación da Violencia contra a Muller, as nosas institucións públicas, organizacións veciñais e agrupacións políticas están a pechar fileiras arredor dunha causa común: a loita colectiva, integral e firme contra a lacra das agresións ás mulleres. Entre os grupos políticos adheridos ás mobilizacións atópase o PSdG-PSOE, que vén de lanzar un manifesto subscrito tamén polas agrupacións dos catro concellos de Arousa Norte. Na proclama, os socialistas declaran “con firmeza que non permitiremos nin un paso atrás na loita contra a violencia de xénero, na súa prevención, no seu tratamento e na reparación das vítimas”. E engaden: “Manifestámolo hoxe 25 de novembro cunha chamada mundial que dende Nacións Unidas atravesa fronteiras e á que nos unimos coa responsabilidade e o convencemento de que se debe, e pódese, rematar coa violencia machista”.
O socialismo galego lembra que son tempos de gran complexidade e que precisan máis ca nunca dunha gran alianza entre persoas, institucións e colectivos, con independencia de cal sexa o seu ideario social ou político, unha fronte social unánime que free o avance do partido de ultradereita e das súas proclamas en contra do 25N e todo o que significa: “Hai un ataque frontal ao feminismo. A sombra da ultradereita cérnese sobre as nosas democracias. Avanza en Europea e España xa non é unha excepción. Agora, pretendendo romper o consenso alcanzando, negan a propia existencia da violencia de xénero, queren sinalar ás persoas que traballan con vítimas, faltan ao respecto ás mulleres asasinadas e ás súas familias e queren retrotraernos a tempos en branco e negro, e queren facelo a costa das mulleres”.
Os grupos socialistas tamén queren lembrar que as devanditas agresións “son a máis brutal mostra de desigualdade entre homes e mulleres”. E recordan tamén que este ano “superamos a dramática cifra das máis de mil mulleres asasinadas polas súas parellas ou ex parellas dende que existen rexistros oficiais en 2003”. A estes números, engaden, cómpre sumar os 275 que ficaron orfos por mor da devandita lacra.