A semana pasada realizáronse os últimos talleres formativos destinados ao alumnado e profesorado dos centros educativos de Boiro que se estaban levando a cabo no marco do programa Boiro Co-Educa: igualdade contra as violencias machistas. Esta iniciativa continúa actualmente coa realización de dúas actividades complementarias ás formacións presencias co obxectivo de involucrar ao conxunto da comunidade educativa.
Ata o de agora, desenvolveuse un traballo simultáneo co profesorado e alumnado nos CEIP de Abanqueiro, Cespón, Escarabote, Praia Xardín, Santa Baia e Santa María do Castro para levar a cabo unhas actividades cuxo propósito radica no impulso dun proceso de reflexión conxunta que facilitase unha reformulación igualitaria da docencia que parta dos propios centros educativos.
En total realizáronse 18 talleres destinados á rapazada de 5º e 6º de primaria, centrándose na promoción da igualdade, a transversalización da perspectiva de xénero e as prácticas co-educativas nos centros. O traballo vivencial articulado nestes obradoiros permitiu abordar, analizar e interiorizar por parte do alumnado tanto o impacto dos estereotipos de xénero na vida das persoas coma a relevancia de identificar, comunicar e respectar os límites persoais propios e os dos demais, así como a identificación e o rexeitamento de conductas violentas vinculadas ás violencias machistas.
O programa prosegue ao longo das vindeiras semanas con dúas actividades coas que se pretende superar o muro das escolas e trasladar o proceso de reflexión e transformación co-educativo ás familias. Unha delas, Lecturas pola Igualdade, pretende incentivar a reflexión e o debate nas familias sobre as limitacións que supoñen os estereotipos de xénero. A segunda delas, Debuxos contra a violencia, ten como obxectivo fomentar que o propio alumnado se transforme en axente de cambio no seu centro educativo.
