A Pobra do Caramiñal continúa inmersa na celebración da vixésimo primeira edición das Xornadas de Homenaxe a Valle-Inclán. Así, o Museo converteuse en epicentro das actividades na tarde do xoves. Primeiramente, tivo lugar a presentación dos números 37 e 38 da revista Cuadrante. No acto interviñeron o director da publicación, Francisco Xavier Charlín Pérez; o investigador e descendente directo do escritor homenaxeado, Xaquín del Valle-Inclán Alsina; a concelleira de Cultura da Pobra, Patricia Lojo Nine; e o director do Museo Valle-Inclán, Antonio González Millán.
Francisco Xavier Charlín destacou que a revista ten 20 anos de historia, pois comezou a súa andaina a comezos do ano 2000. En canto ao número 37, sinalou que recolle artigos variados coma son, entre outros, o texto de Xaquín del Valle-Inclán sobre como o escritor intervén en todo o proceso editorial da súa obra; a reseña sobre o libro de Rodolfo Cardona (especialista no esperpento valleinclaniano); e a nova clasificación proposta por Manuel Vieites (ESAD) sobre o teatro de Valle-Inclán. Mentres tanto, o número 38 trata sobre o intelectual e Josefina Blanco. Segundo expresou Xaquín del Valle-Inclán, abórdase a experiencia do escritor en Roma, que pasa coa familia cando chega a Guerra Civil ou o concepto “misa de ángeles” que aparece reflexado en Divinas palabras, entre outras cuestións.
A continuación, procedeuse ao percorrido das salas do Museo da man dos artistas Roberto Leal e Gemma do Carmo, encargados de levar a escena Ambitus amoenus: De teatro nunha Torre con alma de artista. Unha interpretación maxistral que se gañou o aplauso e felicitacións do público.
Ademais, a Compañía Tatana Teatro encargouse de escenificar na tarde de onte a obra Memorias da Árbore da Noite Triste: Último acto de Valle-Inclán, no Elma.
