O grupo municipal do BNG pobrense levará a pleno unha moción relativa á incorporación de diversos proxectos no Plan Único da Deputación da Coruña para o 2020.
Segundo expoñen, ao municipio da Pobra do Caramiñal correspóndenlle un total de 385.261’27 euros -cantidade que se pode ver incrementada en base a remanentes da propia Deputación- tras a aprobación por parte do pleno da Deputación da Coruña das bases reguladoras do Plan Único para o ano 2020.
Neste senso, a formación nacionalista considera que son varias as actuacións “que levan sendo reivindicadas desde fai moito tempo e que poden ser acometidas con esta axuda.” Así, propoñen dúas intervencións a desenvolver no concello.
Por unha banda, o Bloque manifesta que a Confraría de Pescadores da Pobra do Caramiñal, “un dos sectores máis produtivos máis importantes dentro da comarca, na nosa ría e, por suposto, na Pobra do Caramiñal”, leva tempo reivindicando a dotación dunha infraestrutura onde poder mudarse, ter armarios e outros servizos para as súas tarefas, constituíndo unha “dotación imprescindíbel para mellorar as súas condicións de traballo e evitar moitas situacións que non son de recibo na sociedade actual.” Tamén precisan que xa hai estudos previos, incluso algún proxecto, sobre o lugar onde se podería emprazar, algo que ten que ser acordado entre o propio sector e quen realice a obra. Así mesmo, enténdese como necesario a colocación dun foco na zona de San Antón, aproveitando as infraestruturas xa existentes, para contribuír a erradicar o furtivismo.
Outro dos aspectos a abordar é o estado “de deterioro e mal estado” no que se atopa o Camiño Real ao seu paso pola Ribeiriña e o Conchido, precisando “dunha atención inmediata para o seu arranxo que vén sendo reclamada tanto polos veciños e veciñas como polo BNG, que xa presentou diversas iniciativas a este respecto.” Concretamente, sinalan que levan propostas tódolos anos desde o 2015, “sen ter resposta por parte do Concello.” Deste xeito, referíronse ás fochancas, ás marxes da estrada ou aos accesos ás praias, entre outros.
Por todo isto, o BNG solicita a adopción dos acordos en relación a presentar ao Plan Único 2020 da Deputación da Coruña o proxecto para a dotación dunha infraestrutura para uso da Confraría que permita o seu emprego como vestiario e zona de servizo para os seus membros, así como a colocación dun foco na zona de San Antón que permita a iluminación suficiente para axudar ao combate do furtivismo. Ademais, presentar ao referido Plan o proxecto para o arranxo e mellora do Camiño Real no citado tramo.
