No mitin de Rianxo, celebrado na tarde do venres 1, o candidato do BNG ao Congreso pola provincia de A Coruña, Néstor Rego, pediulle ás persoas “defraudadas co silencio de deputados e deputadas dos outros partidos en Madrid” que voten “en chave galega”, facendo un chamamento a concentrar o voto no Bloque, aducindo que “é a única forza política galega que se presenta e, polo tanto a que responde ao voto en chave galega.”
Neste senso, Néstor Rego manifestou que a formación nacionalista será a voz “que saque da afonía o noso país”, representando os intereses de Galicia. Así mesmo, sinalou que “o BNG nunca fallou nin nunca fallará a este País. Podedes confiar en nós sen dúbidas para defender con decisión os dereitos sociais, os investimentos, os postos de traballo, salarios e pensións dignas, o dereito a pescar, a ter unha industria sólida, a producir e non ter que emigrar.”
Tamén interveu a ex-deputada Rosana Pérez, quen relatou algúns dos momentos da súa experiencia no Congreso, onde “alí, cando había algún tema sobre o noso país e querían consultar coas ‘galegas’ sempre eramos nós, e iso que había moitos deputados e deputadas doutros partidos, mais, as que todo o mundo recoñecía como ‘galegas’ eramos eu e Olaia Fernández Davila, as dúas deputadas do BNG naquel entón.”
Ademais, o alcalde de Rianxo, Adolfo Muíños, defendeu a necesidade de ter voz en Madrid referíndose a casos concretos, coma a iniciativa de Francisco Jorquera pola que en 2007 se conseguira incluír nos orzamentos do Estado unha partida de 700.000 euros destinada á recuperación dos cantís de Tanxil a punta Fincheira. Muíños falou da necesidade de achegar orzamentos para proxectos coma a restauración do pazo do Martelo ou a finalización da casa de Rafael Dieste.
Por outra banda, integrantes do BNG nos municipios de Arousa Norte procederon á pegada de carteis con motivo do arranque da campaña electoral ás 00.00 horas do venres 1, de cara as eleccións xerais do 10 de novembro.
