Ibuprofeno Teatro leva a súa nova obra a Rianxo, Casa O’Rei

O Auditorio de Rianxo vai acoller o venres 15 de xaneiro o espectáculo de Ibuprofeno Teatro Casa O’Rei, escrito e dirixido por Santiago Cortegoso. A representación, que comeza ás 21.00 horas, ten un elenco formado por Miguel Borines, Victoria Teijeiro, Marián Bañobre, Raquel Espada, Víctor Mosqueira, Santiago Cortegoso e Xosé M. Esperante. Trátase dunha obra para público adulto, con entrada de balde até completar capacidade (cómpre retirar a entrada unha hora antes do evento, cun máximo de dúas por persoa).

Casa O’Rei, unha das novas obras de Ibuprofeno, é unha sátira das relacións familiares e dos seus aspectos menos amábeis, xirando o argumento arredor do vello Manolo Rei, que, na recta final da súa vida decide celebrar un xantar con cocido e facer entre as partillas do seu patrimonio entre as súas tres fillas, poñendo o foco na casa de seu: a estrela do conxunto da herdanza. A cousa tórcese cando nin o cocido nin a festa nin as partillas transcorren como deberan transcorrer, ou como o O’Rei quixera que transcorresen.

Con Casa O’Rei, Ibuprofeno Teatro completa a súa triloxía gastronómica, xunto con O furancho e Raclette. Este texto de Santiago Cortegoso propón un xogo escénico e dramatúrxico a partir do Rei Lear de W. Shakespeare, ambientado nunha típica casa de comidas galega.