Ao longo desta mañá desenvolveuse a cuarta xornada do xuízo polo crime de Diana Quer, centrándose no achado e recuperación do corpo da moza madrileña do pozo situado nunha nave de Asados, en Rianxo, no que permaneceu durante case 500 días.
Entre outros, declarou a mergulladora profesional que realizou un simulacro de como o Chicle supostamente somerxería o corpo de Diana no pozo do citado inmoble. Para o simulacro lanzouse a esta profesional, con características físicas semellantes aos da moza madrileña, lastrada con dous bloques de cemento coma os que se atoparon con Diana, equivalentes a dezaoito quilos. A proba evidenciou que o corpo non quedou flotando. A experta asegurou que “nunca, é fisicamente imposible.” Con todo, José Enrique Abuín na súa declaración testificara que o corpo non se afundira.
Así mesmo, falaron dous expertos que participaron na citada reconstrución realizada en Murcia. Un deles manifestou que “se ti antes de morrer, tes algo que te desborda, unha situación de estrés ou unha situación de pánico moi grande, o corpo como resposta pode producir unha adrenalina tan grande que xera un bloqueo e podes quedar bloqueada. Pero iso porque antes de morrer, sucedeu algo espantoso.”
O xuízo retómase a próxima semana.
