Un ano máis o Concello da Pobra do Caramiñal súmase á campaña En negro contra as violencias, adheríndose tamén o comercio e a hostalería local, con motivo do Día Internacional da Eliminación da Violencia contra a Muller, o 25 de novembro. Neste senso, organízase unha serie de actividades co obxectivo de concienciar sobre a violencia de xénero para sensibilizar á poboación e chegar a erradicar unha lacra que afecta a toda a sociedade. Ao acto de presentación asistiron o alcalde Xosé Lois Piñeiro; a concelleira de Igualdade, Charo Varela; a asesora xurídica, María Pérez; a dinamizadora lingüística, Paula Alexandre; e Fran Gómez, en representación de ABAS.
Así, o Auditorio do Museo Valle-Inclán albergará o sábado 23, ás 20.00 horas, o Foro de Muller e Liderado, organizado pola ABAS coa colaboración do Concello. A representante da muller na empresa será Clara Rodríguez Cordeiro, de 7H Cooperativa Cultural; do asociacionismo, Milagros Rey, presidenta de AMBAR; da política, María Xosé Alfonso, ex-alcaldesa e concelleira de Muros; e do sindicalismo, Laura Cereijo, de CCOO en Santiago-Barbanza. Tamén se procederá á entrega de premios do II Concurso de Relatos Curtos Historias de Mulleres. Respecto a isto último, Fran Rei anunciou que, de case o cento de textos participantes, o gañador na categoría adulta é Saltar, de Óscar Reboiras; na modalidade xuvenil Manolo traballa, de Pablo Pardavila; e na infantil, o primeiro relato gañador é Lobos, de Carme Sarasquete, mentres que o segundo é Branco e gris, de Lucía Pérez. Desta maneira, os premios quedan na contorna, constatándose que “nesta comarca hai xente que sabe escribir moi ben e que tamén cre que é un tema importante loitar e traballar por que cada día teñamos unha sociedade moito máis igualitaria.” Estas actividades enmárcanse no proxecto Sálvora, o cal conta coa financiación da Deputación da Coruña
Ao día seguinte, domingo 24, subirase ás táboas do Elma a compañía Ítaca Teatro coa obra Cinco minutos sen respirar. Esta cita terá lugar ás 19.00 horas e encádrase no programa Nós contra a violencia da Rede de Dinamización Lingüística da Xunta e que se engloba no Pacto de Estado contra a Violencia de Xénero.
Xa a próxima semana, o venres 29 estrearase, ás 20.00 horas, no Auditorio do Museo Valle-Inclán a peza audiovisual Na súa pel, creada por Vou Films coa participación da mocidade do municipio pobrense para visibilizar as violencias machistas e sensibilizar á cidadanía.
En decembro, o domingo 8 desenvolverase no Elma, ás 12.00 horas, o contacontos teatralizado O país dos mandóns, un espectáculo de Teatro Ghazafelhos no marco do programa de dinamización lingüística e de prevención da violencia de xénero Nós contra a violencia. En canto a esta cita, Paula Alexandre manifestou que se trata de adaptar ao teatro tres pequenos contos da colección A igualdade conta, de Edicións Embora, constituíndo o seu título toda unha declaración de intencións, pois “queremos sempre traballar o tema da igualdade e da prevención da violencia de xénero dun xeito transversal.”
Ademais, ao longo do que resta de 2019 celebrarase a terceira edición dos obradoiros de igualdade en tódolos centros educativos de infantil e primaria do municipio. En relación a isto, a edil Charo Varela expuxo que o propósito radica en “concienciar da importancia de vivir en igualdade, relacionarnos nenos e nenas, homes e mulleres, en condicións de igualdade.” Por outra banda, a exposición Cartas de amor, cedida pola Secretaría Xeral de Igualdade, estará dispoñible na Casa da Mocidade do 22 de novembro ao 8 de decembro. En canto a esta mostra, María Pérez explicou que se programarán visitas guiadas para o alumnado de secundaria, coa finalidade de “sensibilizar á poboación máis moza para que reflexionen sobre as situacións violentas nas relacións de parella que teñen.”
Finalmente, o rexedor Xosé Lois Piñeiro sinalou que a campaña En negro contra as violencias naceu dunha colaboración entre concellos, tendo “máis impacto porque conseguimos transmitir moito máis en conxunto que por separado.” Engadiu que a cor negra empregada non é casual, xa que “é a cor do loito, da dor e non imos esquecer que a campaña vai en contra da violencia e da morte de moitas mulleres. O que tratamos é de sensibilizar á cidadanía fronte a este problema e temos que facelo de tódalas maneiras que se nos ocorran, sexan máis ou menos efectivas, pero avanzar paso a paso cara a igualdade real.”
