20191001. A Casa da Cultura e Xuventude Raquel Fernández Soler da Pobra do Caramiñal será escenario o venres 4, ás 20.30 horas, dun acto titulado O lobo ibérico, un gran descoñecido. Desde o Concello pobrense sinalan que o obxectivo consiste en “dar a coñece-la importancia deste carnívoro nos ecosistemas do monte galego.” Así, dentro deste programa enmárcanse dúas actividades.
A primeira trátase da conferencia Coñéce-lo lobo?, cunha duración de 45 minutos seguida do documental Lobo e gando, de 15 minutos que aborda a relación entre este animal e a gandería.
Por outra banda, realizarase a exposición fotográfica Os lobos e a súa veciñanza durante todo o mes de outubro para visualizar diferentes aspectos deste animal.
O relator e fotógrafo é Agustín Pérez Souto, naturalista con experiencia no traballo de campo desde 1995, especializado no seguimento do lobo ibérico en Galicia e na comarca do Barbanza. Tamén colaborou no censo do lobo en territorio galego entre os anos 1999 e 2003. Na actualidade, participa na divulgación deste animal en diferentes organización e centros de ensino coma Tourgalia, IES Urbano Lugrís, Pío XII, Caserío da Castiñeira e CM de Baroña, entre outros. Así mesmo, participa no seguimento dos diferentes grupos de lobos no territorio galego, informando e asesorando a persoas do ámbito da gandería da nosa comunidade na convivencia con este animal, e ensinado a mellorar medidas de prevención de ataque ó gando.