Un total de 54 alumnos comezaron a súa formación de Educación Secundaria para Adultos en Boiro

20191009. Esta semana comezaron en Boiro as clases de Educación Secundaria para Adultos coa participación dun total de 54 alumnos, os cales cursarán estas ensinanzas destinadas a maiores de 18 anos que non posúen o título da Educación Secundaris Obrigatoria (ESO). Deste xeito, terán a oportunidade de adquirir, actualizar ou complementar os seus coñecementos e aptitudes para o seu desenvolvemento persoal e profesional.

Entre os obxectivos específicos destas aulas figuran os de adquirir e actualizar a formación básica, mellorar a cualificación profesional, así como adquirir novos conceptos, técnicas e habilidades para unha adaptación ao mundo laboral actual. A aula de educación de adultos de Boiro está adscrita ao IES San Clemente de Santiago de Compostela, desprazándose ao municipio o profesorado do centro nas avaliacións.

Os cursos son cuadrimestrais, en horario de 20.00 a 22.00 horas, posibilitando a compatibilidade coa xornada laboral. Nesta convocatoria hai matriculados 54 alumnos entre os catro módulos -1º, 2º, 3º e 4º- con posibilidade de realizar dous módulos en cada curso escolar. Cada un dos módulos consta de diversos ámbitos: científico-tecnolóxico (matemáticas, naturais, física), ámbito lingüístico (galego, castelán, inglés ou francés) e sociais.

A concelleira de Educación, María Outeiral, asistiu tamén ao inicio das aulas para darlle a benvida aos alumnos. Desde o Concello de Boiro manifestan que apostan por estas ensinanzas para mellorar o desenvolvemento persoal e profesional dos alumnos que, neste 2019-2020, proceden tanto de Boiro coma dos municipios de Rianxo, A Pobra do Caramiñal,  Ribeira e Porto do Son.