20191002 Este 4 de outubro, Rianxo homenaxeará ás vítimas da Guerra Civil poñendo o foco nas moitas (mulleres e homes) que non chegaron a encher nin unha liña dos libros oficiais. O tributo, a décima edición do Seminario pola Memoria, inclúe o o seminario en si mesmo, unha mostra (a exposición 80 anos. Santiago 1936 que se pode ver no IES Félix Muriel) e máis un acto de homenaxe as mulleres que deron o seu apoio aos presos do campo de concentración de Rianxo. As actividades veñen da man do Concello de Rianxo, Nova Escola Galega, a Comisión pola Recuperación da Memoria Histórica do Barbanza, o IES Félix Muriel de Rianxo e máis o colectivo Barbantia.
Como dixemos, a décima edición do Seminario pola Memoria, que se celebra baixo o lema A liberdade nunca perde ningunha loita! (Ramón Cabanillas) porá o foco nas silenciadas: as mulleres solidarias cos prisioneiros do campo de concentración de Rianxo e, “por extensión, todas as mulleres represaliadas e solidarias”.
A concentración celebrarase o 4 de outubro ás 20.15 horas, onde tivo as súas dependencias o devandito campo de concentración. Este, para que non saiba, chegou a acubillar máis de tres mil prisioneiros durante un período de dous anos. Segundo relata Cilia Torna en Sermos Galiza, o cárcere comezou a funcionar en novembro de 1937, nas instalacións dunha antiga fábrica de salgadura construída arredor de 1870, propiedade da familia Goday e situada no lugar de O Castelo. O edificio foi derrubado en 2002 para construír unha urbanización.
