20191011 Este sábado, malia coincidir con festivo, vai ser un sábado de conto en Ribeira, na Biblioteca Municipal. Así, as nenas e nenos de idades comprendidas entre os 3 e os 12 anos, acompañadas e acompañados das súas familias, van poder asistir ao espectáculo A maxia dos contos, a cargo de Manuel Solla, a partir das 12.00 horas na biblioteca. A cita vén da do Concello, a Xunta e a Deputación da Coruña, ao abeiro do programa de dinamización da lectura Ler conta moito.
A maxia dos contos é un espectáculo de narración oral de case unha hora de duración que busca, a través de diversas propostas e formatos (maxia, relatos, monicreques, adiviñas, etc), mostrar ante a rapazada a importancia de non perder nunca o beneficioso hábito da lectura. Para conseguilo máis plenamente, o contacontos axudarase dunha maleta máxica (unha das protagonistas do espectáculo) e dos seres fantásticos que nela habitan.
