20191004 A Deputación da Coruña deu luz verde a un novo paquete de obras (223) para os concellos ao abeiro do Plan Único (POS+2019) da entidade provincial, e que supoñen un investimento extra de 22,7 millóns de euros que sumar aos 100 consignados no orzamento do plan para este ano. En total, estariamos a falar de 551 obras para 93 concellos. A Deputación, con estas novas achegas, quere situar os municipios coruñeses á cabeza das administracións locais de España en materia de financiamento das deputacións.
Segundo fixo saber o presidente Valentín González Formoso, as actuacións programadas axudarán a “mellorar as infraestruturas, a calidade de vida e a economía dos concellos coruñeses”. O titular da entidade provincial tamén salientou a importancia de que o reparto dos fondos estea baseado en criterios obxectivos (poboación, superficie, número de parroquias e esforzo fiscal) e de que sexan os propios concellos os que deciden en que queren investir os fondos que lles achega a Deputación.
Entre os proxectos que obteñen cobertura económica da entidade provincial atópanse iniciativas dos concellos de Barbanza. Por exemplo, no caso de Boiro, as obras de pavimentación en Coroño, Cabo de Cruz, Cespón e Treites (66.251,89 achegados pola Deputación), as obras de pavimento en Pomar do Río, Cadarnoxo, Enseño e Cures (73.235,53 da entidade provincial) ou as beirarrúas na praia de Barraña (máis de 85.500 euros fornecidos, tamén, pola Deputación). Isto polo que se refire a Boiro.
En Pobra, obterá case 150.000 euros o proxecto de actuación integral na Mirandela. En Rianxo, a rede de saneamento de Burés, fase primeira (115.138,95 euros da Deputación) e a rede de saneamento de Pousada, fase primeira (222.357,39 euros).
Polo que se refire a Ribeira, a entidade provincial subministrará 326.718,74 euros para a rede de saneamento con pozo de bombeo en Muíños, e 30.719,79 euros para a pavimentación de camiños en Sego.
O total achegado para a comarca de Barbanza, incluídos proxectos en Porto do Son, Carnota, Muros, Lousame e Mazaricos, é de 2.433.952.93 euros.
