20191014. O Partido Barbanza Independiente (PBBI) defende que o Día da Dorna e o Martes de Entroido sexan os festivos locais de Ribeira para o 2020. O voceiro desta formación, Vicente Mariño de Bricio, manifesta que esta é a postura que os compoñentes do seu partido acordaron por unanimidade na última reunión para defender no pleno no que se debata sobre esta cuestión.
Desde o PBBI precisan que, con esta posición, pretenden “defender os intereses da hostalería e do comercio”, sostendo que terán en conta nas súas propostas “o desenvolvemento económico e a promoción do emprego.” Para iso, indican que previamente escoitaron as opinións dos integrantes deses sectores, os cales “consideran que o Martes de Entroido supón importantes movementos económicos para os seus negocios.”
Neste senso, Mariño de Bricio puntualiza que tódolos membros do PBBI “coincidiron na visión da necesidade de darlle un impulso económico a todo o municipio potenciando eses días”, defendendo así a súa elección dos festivos locais e solicitando que os demais grupos da corporación se unan á súa proposta.
O PBBI entende que “foi un grave erro que saíra adiante a proposta do Executivo local de suprimir en 2019 o festivo local do Martes de Entroido, ao acabar cunha tradición moi enraizada na localidade.” Deste xeito, sinala que “nin tan sequera o reforzo cunha programación de actividades, coma a contratación de orquestras de recoñecido prestixio, reportou resultados apetecibles.”
Así mesmo, o PBBI sinala que esta postura “non entra en desacordo coa defensa do festivo local para a patroa”, xa que o 12 de setembro de 2020, día de Santa Uxía, coincidirá en sábado, polo que “non será necesaria a súa elección como festivo local, pois ao coincidir a celebración da patroa en fin de semana pódese considerar que é case coma un festivo, co engadido de que poderán abrir os negocios aproveitándose da maior afluencia de xente pola celebración do tradicional mercadiño semanal dos sábados, e que tanto a hostalería coma o comercio teñan a oportunidade de potenciar os seus negocios.”
Ademais, segundo expresa a formación política liderada por Vicente Mariño, proporán durante o próximo ano “medidas e actividades para potenciar o fin de semana da patroa, de maneira que así se consigan tres días fortes.”