O espectáculo premiado co Manuel María de Proxectos Teatrais pasará por Rianxo

20191017 O espectáculo O meu mundo non é deste reino, de Teatro de Ramboia, gañou o ano pasado o primeiro Certame Manuel María de Proxectos Teatrais convocado pola Fundación e Casa-Museo Manuel María. Trátase dunha recreación da Farsa de Bululú, unha sátira das ditadura franquisata do devandito autor chairego, cun elenco integrado por Fran Lareu e Anxo García baixo a dirección de María Peinado. A representación iniciará en datas vindeiras unha xira pola nosa terra que a levará por diferentes concellos, entre os que se atopa o de Rianxo.

Esta xira vén implícita pola propia natureza do galardón, que non ten contía económica pero que si con representacións: dende a Fundación faise unha achega económica de 2.000 euros, e tanto os concellos colaboradores (A Coruña, Ames, Barbadás, Betanzos, Brión, Cambados, Cambre, Cangas, Carballo, Carral, Cedeira, Culleredo, Malpica, Monforte, Muros, Neda, Oleiros, Ponteareas, Pontevedra, Rianxo, Ribadeo, Verín, Vimianzo) como as deputacións adheridas (A Coruña, Lugo e Pontevedra) comprométense a que O mundo non é deste reino sexa incluído na súa programación. En base a isto, o espectáculo premiado ten un punto de partida de máis de dúas ducias de representacións.

O xurado, con respecto da obra recoñecida, salientou “o amplo abano de público ao que se dirixe”; “a diversidade de espazos e ambientes nos que pode ser escenificado” e “a probada calidade artística do elenco de actores”.