O Día da Bicicleta chega a Boiro este domingo

01 Outubro 2019

20191001. O Concello de Boiro organiza este domingo 6 o Día da Bicicleta, unha cita que pretende homenaxear a este vehículo. A concentración dos participantes realizarase na praza do Concello, ás 10.30 horas, con saída prevista para as 11.00 horas. O itinerario está composto por 15 quilómetros, aproximadamente, percorrendo distintas vías de Boiro, Escarabote, Cabo de Cruz, Saltiño, Abanqueiro e volta ao punto de inicio. A chegada está programada para ao redor das 13.30 horas, momento no que se procederá ao sorteo de agasallos.

Co obxectivo de garantir a seguridade, non está permitido a utilización de bicicletas con rodíns e establécese como obrigatorio o uso de casco. Ademais, este evento contará coa participación da Policía Local de Boiro, Protección Civil e Garda Civil, así como ao redor de 15 voluntarios da organización, o Club Ciclista Barbanza e Boiromotos, os cales velarán polo cumprimento das normas en aspectos de seguridade e o seguimento do circuíto marcado. Disporase tamén dunha ambulancia, un vehículo/taller e un autobús escoba.

No que respecta ao tráfico, desviarase a circulación da rúa Principal, desde a rotonda de Espiñeira ata o cruce coa rúa de Robustiano Pérez del Rio, pola Avenida da Constitución xusto no momento da saída.

Outros artigos

Publicidade

Revista en papel

Opinión