O Concello de Ribeira informou hoxe de que vén de recibir un escrito da Deputación da Coruña no que a entidade provincial conmina ao Executivo ribeirense a cambiar por outra actuación a mellora da estrada entre o campo de fútbol de Oleiros e o lugar de Balteiro, na mesma parroquia de Oleiros, unha obra incluída no Plan de Obras e Servizos 2019 (POS) da Deputación, ao abeiro do Plan Adicional. As obras que a entidade provincial urxe trocar consistían na ampliación da estrada DP-7303 que une os dous ditos emprazamentos da parroquia de Oleiros.
A Deputación pide que o proxecto sexa substituído por outro investimento ao estar focalizada tal intervención nunha estrada de competencia provincial. A tal efecto, dende o Concello estanse a valorar diversas alternativas, que en todo caso deberán ser adoptadas en sesión plenaria da Corporación municipal.