20191003. Ribeira será escenario o domingo 6 dunha andaina solidaria a favor da Asociación Galega de familias de nenos Prematuros (AGAPREM) organizada pola Asociación de Amas de Casa de Ribeira, en colaboración co Concello. A cita arrancará na praza do Consistorio, ás 10.30 horas, para realizar un itinerario de 8 quilómetros, aproximadamente, considerado de baixa dificultade e que percorrerá diversos emprazamentos coma O Touro, Ameixida, A Garita, Frións, San Roque e volta ao punto de saída. Así o deron a coñecer a tenente de alcalde, María Sampedro; a presidenta do colectivo de Amas de Casa, Puri Cores; e Sofía Pego, en nome de AGAPREM.
Unha vez concluída a andaina, procederase á proxección dun vídeo da asociación, ao sorteo de regalos doados por comercios e farase un avituallamento.
A presidenta de Amas de Casa, Puri Cores, animou á veciñanza a participar nesta iniciativa aberta a tódolos públicos. Os interesados poden inscribirse previamente nos teléfonos de contacto 653333124, 619066684 ou 981874577. Tamén é posible formalizala o propio día mediante donativo no momento da entrega dos dorsais. Polo de momento, xa hai 130 persoas anotadas.
Ademais, Puri Cores expresou o seu agradecemento aos comercios colaboradores, ao Concello, a Sofía Pego en representación de AGAPREM, á xunta directiva das Amas de Casa e a Fran Romay por participar activamente na organización e preparar o itinerario.
