20191017 O vindeiro 23 de outubro pola tarde van comezar no Colexio Público Rural Agrupado de Rianxo (o CRA de Rianxo) as novas actividades do Club de Ciencia Nautilus, para o que, segundo informa a dirección do centro, xa está aberto o prazo de solicitude de inscricións, que remata o día 22. Haberá, novamente, actividades participativas, divertidas e creativas para estimular a científica e o científico que todas as nenas e nenos levan dentro. Cómpre estarmos atentos á axenda.
O CRA de Rianxo, que recentemente adheriuse ao programa Biblioteca Creativa (que tamén busca alentar as vocacións científicas e tecnolóxicas da rapazada dende idades temperás), participa na convocatoria de Clubes de Ciencia da Consellería de Educación, ao abeiro do cal puxo en marcha hai dous anos o proxecto Nautilus, que ten achegado obradoiros sobre ciencia, novas tecnoloxías, robótica, fauna mariña, química, electricidade ou sobre os segredos do corpo humano, entre outros moitos temas de interese.
O proxecto Club de Ciencia Nautilus ten o obxectivo de “animar a curiosidade científica do alumnado nunhas idades nas que a curiosidade invade os seus intereses”. Tamén busca formar á rapazada en hábitos de coñecemento a través da investigación e da exploración.
