20191004. Con motivo da Mostra de Teatro de Ribeira, no Auditorio municipal terá lugar hoxe, venres 4, ás 21.30 horas, a posta en escena de Idiota da man de Redrum Teatro. Jordi Casanovas é o autor deste espectáculo dirixido por Alex Sampayo e que narra a historia de como Carlos Varela -interpretado por Machi Salgado- por fin cre que a súa sorte mudou, xa que un anuncio ofrece unha chea de cartos a cambio de someterse a unha serie de probas psicolóxicas. Recíbeo unha doutora de orixe alemá -interpretada pola ribeirense Susana Sampedro-, comezando as preguntas e a comedia. Unha comedia que non tarda en ennegrecerse atrapando ao protagonista e ao público nunha tea de araña. Este texto composto de minas en forma de dilemas morais e descargas de presión psicolóxica, mergúllase nos mecanismos de manipulación, nos resortes da cobiza, o poder das grandes corporacións, a desinformación culpable, a capacidade da tolerancia ante o abuso da autoridade e as inconmensurables dimensións da estupidez humana, sempre ignorante das cláusulas en letra pequena que impón a vida.
Cómpre lembrar que a totalidade dos bonos foron vendidos, polo que xa está o aforo completo.