A Policía Local de Rianxo procedeu no día de onte, 23 de outubro, á identificación dun varón de 44 anos e veciño de Ribeira ao cal lle foron ocupadas varias cantidades de diversas sustancias estupefacientes e armas prohibidas, procedéndose á instrución das dilixencias oportunas por un delito contra a saúde pública.
As cantidades de droga intervida foron 20’56 gramos de cocaína, 19’5 gramos de heroína e 3’5 gramos de speed, as cales, unha vez preparadas para a súa distribución na rúa, proporcionarían, aproximadamente, 88 doses de cocaína, 168 doses de heroína e 16 doses de speed. Ademais, fóronlle intervidas 5 armas brancas, unha defensa extensible e outros efectos.
Con esta intervención, a Policía Local de Rianxo da por desartellado un punto de menudeo de drogas no municipio.
Esta actuación enmárcase no dispositivo establecido no Plan de control de venda e consumo de estupefacientes en zonas de ocio e proximidades de centros escolares, que se está a efectuar en colaboración co persoal do posto da Garda Civil desta localidade.