Ibuprofeno Teatro recala na Mostra de Teatro de Ribeira

20191018. Con motivo da Mostra de Teatro de Ribeira, no Auditorio municipal terá lugar hoxe, venres 18, ás 21.30 horas, a posta en escena de Casa O’Rei da man de Ibuprofeno Teatro, completando así a súa triloxía gastronómica xunto con O Furancho e Raclette. Escrito e dirixido por Santiago Cortegoso, proponse un xogo escénico e dramatúrxico a partir de O rei Lear de William Shakespeare, ambientado nunha típica casa de comidas galega. O espectáculo narra a historia de Manolo Rey, vello e enfermo, que prepara un cocido e reúne á familia, pois a comida sempre é unha escusa. Nesta ocasión, será para repartir a Casa entre as súas tres fillas. Pero o cocido sae cargado de traizón e desprezo, intragable polo amargor dun mundo novo, ácido e descoñecido, que trae do estranxeiro unha morte preconxelada e sazonada con bile. O tempo, o destino e o Burger King son implacables coa sorte dos mortais que non saben seleccionar os ingredientes idóneos para elaborar as receitas da súa vida.

O elenco está composto por Miguel Borines, Victoria Teijeiro, Marián Bañobre, Raquel Espada, Víctor Mosqueira/Santiago Cortegoso e Xosé M. Esperante.

Esta peza teatral conta coas distincións a Mellor Montaxe no Certame de Teatro Garnacha de Rioja Haro e a Mellor Actor Protagonista e Mellor Música Orixinal nos XIII Premios de Teatro María Casares.

Cómpre lembrar que a totalidade dos bonos foron vendidos, polo que xa está o aforo completo.