O outono é unha estación na que, xeralmente, chove de maneira abundante e o termómetro baixa considerablemente, polo que xa non é común realizar tantas actividades ao aire libre coma sucede no verán. A pesar disto, non hai razón pola que aburrirse na casa, xa que a comarca conta con numerosas propostas coma teatro, contacontos, conferencias, exposicións… E tamén lectura. Por que, acaso hai mellor maneira de viaxar sen necesidade de saír á rúa? Así, rematando o presente mes, as Bibliotecas dos concellos de Arousa Norte reforzaron o seu catálogo adquirindo novas obras para tódolos gustos e para tódalas idades.
