20191014. Con motivo das obras que se están desenvolvendo na ribeirense rúa Rosalía de Castro, a partir do mércores 16 procederase a cortar ao tráfico rodado o tramo da citada vía comprendido entre Marcial del Adalid e Lugo.
Así, e co obxectivo de permitir os vehículos ata a praza do Concello, reordenarase temporalmente a circulación na zona, invertendo o sentido na rúa Lugo, á cal se accederá desde a rúa Cristóbal Colón. Ademais, na rúa Marcial del Adalid só se poderá circular en sentido ascendente.
Por outra parte, durante estas obras limitarase o peso máximo autorizado respecto aos vehículos que baixen polo tramo superior da rúa Rosalía de Castro a 3.500 quilogramos por mor da pendente que logo teñen que afrontar en Marcial del Adalid.
Cómpre lembrar que a actuación que se está a efectuar en Rosalía de Castro consiste na creación dunha plataforma única a través da pavimentación da zona da calzada cunha capa de formigón con franxas de pedra intercaladas. A duración destes traballos estímase en tres semanas, despois das cales será reaberta á circulación de vehículos.
