Este sábado vai ter continuidade en Ribeira, na Biblioteca, o ciclo Sábados de Conto (relatos orais e espectáculos para nenas e nenos de entre 3 e 12 anos, todos os sábados pola mañá e de entrada gratuíta). Desta volta, é a quenda do espectáculo Mulleres Galegas Ilustradas, do grupo Polo Correo do Vento. A cita, organizada polo Concello, a Xunta e a Deputación (programa Ler Conta Moito), comezará ás 12 horas.
Trátase dun divertido, divulgativo e enriquecedor percorrido polas vidas de catro sobranceiras mulleres da nosa historia: a científica Ángeles Alvariño, a pintora surrealista Maruja Mallo, a escritora María Victoria Moreno e a mestra e pedagoga Ernestina Otero. Amais destas catro figuras históricas galegas, e a través delas, farase tamén unha homenaxe a todas as mulleres, famosas ou anónimas, que contribuíron á elaboración de todos os relatos orais ilustrados do mundo.
O espectáculo, un obradoiro creativo, mestura o formato de contacontos con actividades para as nenas e nenos de máis de tres anos. Terá unha duración de 60 minutos aproximadamente.
