20190916. Coincidindo co Día Mundial do Alzhéimer, a Asociación Galega de Axuda aos Enfermos con Demencia tipo Alzhéimer (AGADEA), celebra o seu 25 aniversario cunha gala, o sábado, 21 de setembro, no Hotel San Francisco de Santiago de Compostela. Este será o punto de encontro para usuarios, familias e traballadores das distintas zonas onde a entidade presta servizo, entre as que se atopa Santiago, Ribeira, A Estrada, Vedra, Teo e proximamente Boiro. Cómpre lembrar que en Ribeira abriu o primeiro Centro de Día en xullo de 2010 con 30 prazas e posteriormente creou o Servizo de Estimulación Terapéutica.
Para esta xuntanza, que contará coa presenza da conselleira de Política Social, Fabiola García, e representantes políticos da zona do Barbanza coma a tenente alcalde de Ribeira, María Sampedro; a concelleira de Servizos Sociais, Ana Ruiz; a edil de Servizos sociais de Boiro, Marisa Collazo; e a súa homóloga de Educación, María Outeiral.
Na gala estrearase un corto protagonizado, en parte, por familiares e persoas usuarias dos centros de Ribeira. Tamén haberá actuacións musicais e recoñecementos a voluntarios, entre outros.
O prezo de cada invitación á gala é de 10 euros, podéndose adquirir nos centros de AGADEA de Ribeira. Ademais, disporase dun autobús gratuíto que partirá da cidade ribeirense. A recadación obtida irá destinada ao mantemento dos proxectos que a entidade ten activos, co obxectivo de poder servir de axuda as persoas con alzhéimer e as súas familias.
