20190916. O Museo do Gravado de Artes, que proximamente cumprirá dúas décadas de existencia, acolleu o sábado a entrega de galardóns da décima edición dos Premios Atlante de Gravado.
As notas da sonata para piano A Tempestade de Beethoven tocadas por Yuri Durán deron inicio a unha cita que contou coa presenza na mesa presidencial do director xeral de Políticas Culturais da Xunta de Galicia, Anxo M. Lorenzo; do presidente da Fundación Museo de Artes e alcalde de Ribeira, Manuel Ruiz; o vicepresidente e impulsor do museo, Javier Expósito; o fillo adoptivo ribeirense e patrono da fundación, Ramiro Carregal; a voceira do xurado, Carmen Hermo; e o novo patrono Emilio Santasmarinas.
O bilbaíno afincado en Barcelona Juan García Escudero foi o principal distinguido ao recibir o Premio Ramiro Carregal Rey, dotado con 5.000 euros. García Escudero asistiu persoalmente a recoller o galardón, ao igual que o fixeron outros premiados -en modalidades agraciadas con 2.500 euros- coma Ana María Bellido Zambrano, procedente de Cádiz, e María Gabriela Guzmán, quen acudiu expresamente desde Chile. Tamén foi distinguida cun Atlante a polaca Anna Trojanowska -neste caso recolleu o premio o artista noiés Afonso Costa-, mentres que a coruñesa Nuria Pena recibiu o premio Galicia, dotado con 2.000 euros.
Integraron o xurado Alfonso Costa, Manuel Ayaso, Carmen Hermo, Isabel Pintado, Juan Monterroso, Daniel Buján e José Manuel López Vázquez. Este último falou en nome de todos eles e expresou as dificultades de que uns premios de gravado cumpran dez anos de existencia.
De xeito paralelo á entrega de distincións, procedeuse á apertura dunha exposición cun total de 40 obras seleccionadas de entre as 400 de 30 países recibidas, o que denota o prestixio destes premios fomentados por un museo que, en palabras do seu alma mater Javier Expósito, “é o mellor de Europa no mundo do gravado antigo e contemporáneo.”
O rexedor Manuel Ruiz asegurou durante o seu discurso que, coa sinatura do comodato subscrito entre fundación e concello ribeirense, o futuro dos premios Atlante está asegurado durante polo menos outros vinte anos máis.
Logo dunha nova interpretación ao piano por Yuri Durán concluíu a cerimonia dunha hora de duración que rematou cunha foto de familia.
