20190902. A Biblioteca Municipal de Ribeira conmemora cunha nova mostra os oitenta anos do inicio da Segunda Guerra Mundial, celebrados onte a raíz da entrada en Polonia das tropas nazis o 1 de setembro de 1939. A exposición está integrada por un cento de obras, tanto bibliográficas coma audiovisuais, e permanecerá aberta todo o mes de setembro.
Deste xeito, foi preciso realizar unha escolma de todo o material que garda a dependencia municipal, decantándose finalmente por 60 libros e 40 filmes. Os interesados atoparán distintos xéneros -histórico, literario e banda deseñada, entre outros-, películas e documentais. Dentro deste conxunto figuran pezas coma, por exemplo, O neno do pixama de raias, O diario de Ana Frank e Maus.
A concelleira de Educación, Juana Brión, animou a toda a veciñanza e, especialmente, ás escolas para que visiten a mostra no transcurso do presente mes.
Pola súa parte, Xoán Fernández Callón, traballador da biblioteca, fixo fincapé na dimensión de espazo público de difusión cultural, debate e educación social que ten este servizo municipal conforme á normativa vixente. Así mesmo, destacou a necesidade do coñecemento da Segunda Guerra Mundial como unha das chaves esenciais para comprender o mundo actual nos eidos político, económico, social e cultural, así como “debemos entender da historia os erros do pasado para non repetilos.”